سلام اس پر کہ نام آتا ہے بعد اللہ کے جس کا ۔ راغب مراد آبادی

نعت کائنات سے
Jump to navigationJump to search


شاعر: راغب مراد آبادی

نعتِ رسولِ آخر صلی اللہ علیہ وآلہ وسلم[ترمیم | ماخذ میں ترمیم کریں]

سلام اس پر، کہ نام آتا ہے بعد اللہ کے جس کا

سلام اس پر، مقام آتا ہے بعد اللہ کے جس کا


سلام اس پر، جسے اللہ نے مبعوث فرمایا

سلام اس پر، کہ جس نے پرچمِ توحید لہرایا


سلام اس پر، جو آیا نازشِ پیغمبراں بَن کر

سلام اس پر، جو آیا درد مندِ اِنس وجاں بن کر


سلام اس پر، خدا نے خود محمد جس کو فرمایا

سلام اس ابرِ رحمت پر، کہ جس کا ہم پہ ہے سایہ


سلام اس پر، کہ جو ختم الرسل، محبوبِ داور ہے

سلام اس پر، کہ جو مظلوم انسانوں کا یاور ہے


سلام اس پر، حرا میں جس پہ اتری آیتِ اقراء

سلام اس پر، کہ لہرایا ہے جس نے رایتِ اقراء


سلام اس پر، لقب ہے رحمتہ اللعالمیں جس کا

سلام اس پر، دو عالم میں کوئی ثانی نہیں جس کا


سلام اس پر، جو اُمّی مہبطِ وحیِ الہیٰ ہے

سلام اس پر، کہ جو، منذر، مبشر اور ناہی ہے


سلام اس پر، کہ جو ہے مہتدیِ نوعِ انسانی

سلام اس پر، کہ جو ہے قاریِ آیاتِ قرآنی