جو در شاہ دیں سے ملتا ہے ۔ محشر بدایونی

شاعر: محشر بدایونی

نعتِ رسولِ آخر صلی اللہ علیہ وآلہ وسلم

جو درِ شاہ دیں سے ملتا ہے

وہ سکوں کب کہیں سے ملتا ہے

کوئی بھی جستجو ہو کوئی لگن

ذوق منزل وہیں سے ملتا ہے

دل کو عرفان ذاتِ ختمِ رُسل

انتہائے یقیں سے ملتا ہے

آپ کی شانِ حُسن کیا کہنا

حسّن، حسن آفریں سے ملتا ہے

اللہ اللہ وہ روضئہ پُر نور

ہر اجالا وہیں سے ملتا ہے

والضحیٰ ہو زباں پہ یا والشمس

حسنِ معنی انہیں سے ملتا ہے

کیا کہیں کس قدر سکوں محشر

ذکرِ سلطان دیں سے ملتا ہے