تلازمہ کاری 16

نعت کائنات سے
(تلازمہ کاری - 16 سے رجوع مکرر)
Jump to navigationJump to search


Talazma kari 16.jpg


تحریر : محمد نور آسی ۔ اسلام آباد

نعت ورثہ میں تلازمہ کاری 16 کی رپورٹ[ترمیم | ماخذ میں ترمیم کریں]

نعت ورثہ سوشل میڈیا پر ایسا ادارہ ہے جو نعت رسول کریم صلی اللہ علیہ وسلم کی ترویج کے لئے ہمیشہ بہت شاندار سرگرمیاں منعقد کرتا رہتا ہے ۔ ان سرگرمیوں میں دنیا بھر سے عاشقان رسول صلی اللہ علیہ وسلم پروانوں کی صورت میں جوق در جوق شامل ہوتے ہیں ۔ تلازمہ کا ری کا ایونٹ نمبر 16 بھی عقیدت و محبت کا ایک ایسا یادگار ایونٹ تھا جس میں محبت رسول ﷺ سے لبریز بے شمار خوب صورت اشعار پیش کئے گئے ۔ ہر عاشق رسول نے عقیدت کے وہ پھول نچھاورکیے کہ سبحان اللہ ۔

تلازمہ کاری میں در اصل دو بہت دور کے الفاظ دیے جاتے ہیں اور شعراء پرواز ِ تخیل کی بنیاد پر ان دو الفاظ کو ایک ہی شعر میں استعمال کرتے ہیں۔ الفاظ کے ظاہری تعلق چونکہ بہت موہوم ہوتا تو ان کو ربط میں لانے کے لیے کئی بار شعراء بہت نیا اور دور کا خیال لانے میں کامیاب ہو جاتے ہیں ۔ موجودہ سلسلے میں دو الفاظ " روشنی " اور " نخل" دیے گئے ۔ جس میں دنیا بھر سے سو سے زائد شعراء نے بھر پور جذ بے کے سا تھ حصہ لیا۔دو سو سے زائد اشعار پیش کئے گئے ۔ ہر شعر اپنی جگہ پر عقیدت و محبت کے سا تھ ساتھ تخیل و مضمون آفرینی کا ایک شاہ کار تھا۔

رپورٹ کے لیے اشعار کا انتخاب ایک مشکل مرحلہ تھا کہ ہر شاعر نے اپنے تخیل کو عقیدت کے اس رنگ میں پیش کیا تھا کہ کسی شعر کو انتخاب میں شامل نہ کرنے کا فیصلہ ایک کار دشوار بن گیا۔ ذیل میں جو انتخاب دیا جا رہا ہے وہ اس سرگرمی کی محض ایک جھلک ہی سمجھئے ۔ اشعار کی ترتیب کسی تخصیص کے بغیر ہے ۔ اشعار جس طرح موصول ہوئے اسی ترتیب سے پیش کیے جا رہے ہیں ۔ اشعار ملاحظہ فرماِئیے ۔ مجھے یقینا ہے کہ "روشنی اور نخل " سے پھوٹنے والے نعتیہ انوار سے یقینا آپ اپنے دل و جاں پر کیف و سرور کی ایک پھوار برستی محسو س کریں گے ۔


وہ سانس لیں تو کئی نخل سبز ہوتے ہیں

کریں وہ بات تو ایک روشنی نکلتی ہے

ابو الحسن خاور

۔۔۔۔۔۔۔۔۔۔۔

نخل مراد کیسے نہ سر سبز ہو مرا

پڑتی ہے ایک غار سے جب اس پہ روشنی

ارشاد نیازی

۔۔۔۔۔۔۔

اک خیال ابھرا بشکلِ نخل شاخِ ذہن پر

گلشنِ حرف و معانی روشنی سے بھر گیا

فاضل میسوری

۔۔۔۔۔۔۔۔۔۔

غارِ حرا سے روشنی پُھوٹی جہان میں

نخلِ وجودِ زیست ثمر بار ہو گیا

علیم اطہر

۔۔۔۔۔۔۔۔۔۔۔

نخلِ جاں پر چھا گئی ہے اسم_احمد کی ضیا

روشنی ہے چار سوُ اب تیرگی جاتی رہی

صفیہ ناز صابری

۔۔۔۔۔۔۔۔۔۔۔۔۔۔

سر سبز نخلِ دل یہ ہوا ان کے نام سے

در آئی حرف حرف میں مدحت کی روشنی

سمیعہ ناز

۔۔۔۔۔۔۔۔۔۔۔

آنکھوں سے روشنی کا سفر دور تک گیا

نخلِ وجود کِھل گیا کرتے ہی ذکرِ نور

شائستہ سحر

۔۔۔۔۔۔۔۔۔۔

شاخ درشاخ مری سوچ سے اب پھوٹتی ہے

روشنی،نخل تخیل کوجوآقاسے ملی

مطلوب الرسول

۔۔۔۔۔۔۔۔۔۔۔۔۔

اُن کی نسبت سےیہ اُجالا ہے

نخلِ دل روشنی کا ہالہ ہے

عبد الباسط

۔۔۔۔۔۔۔۔۔۔۔۔

مرے حضور کی الفت کا نخل ایسا ہے

جو صرف چھائوں نہیں، روشنی بھی دیتا ہے

تحسین یزدانی

۔۔۔۔۔۔۔۔۔۔۔۔


ثمر آور ابھی ہونے کو اب نخل تمنا ہے

نسیم صبحدم اک روشنی طیبہ سے لائی ہے

عبد الغنی تائب

۔۔۔۔۔۔۔۔۔۔۔۔


اس کے نصیب میں ہو وہ روضے کی روشنی

اس نخلِ چشم کو کبھی سیراب کیجیئے

۔

حاصل ہے اس کونسبت ِ قرنی سے روشنی

یہ نخل عشق پاکﷺ ہے سب موسموں میں سبز

محمد نور آسی

۔۔۔۔۔۔۔۔۔۔

عشقِ احمد سےدل ہےنخلِ طور

میں تودن رات روشنی میں ہوں

عبید بخاری

۔۔۔۔۔۔۔۔۔۔۔

خیالِ گنبدِ خضریٰ سے روشنی لے کر

یہ نخلِ عشقِ محمد سدا مہکتا ہے

اعجاز احمد

۔۔۔۔۔۔۔۔۔

صلِ علی کے ورد سے روشن رہا چراغ

نخلِ شعورِ ذات کو یوں روشنی ملی

خرم جمیل

۔۔۔۔۔۔۔۔۔

نخلِ ایمان جب چمکتا ہے

روشنی روح تک پہونچتی ہے

۔

سبز گنبد کی روشنی کے طفیل

نخل امید کو حیات ملی


غلام جیلانی سحر

۔۔۔۔۔۔۔۔۔۔

ہو اشارہ تو نخل چلنے لگے

مسکرا دیں تو روشنی پھوٹے

حسنین الثقلین

۔۔۔۔۔۔۔۔۔۔۔۔

نخل ِ عشق ِ شَہہِ والا کو اُگا لو دل میں

جس کے سائے سے ملے روشنی اُمّیدوں کو

مُحمَّد خلیل الرَّحمٰن خلیلؔ

۔۔۔۔۔۔۔۔۔۔۔

اس کے عکس نور سے پرنور ہیں دونوں جہاں

روشنی کی نخل جو پھوٹی تھی غار ثور سے

جاوید صدیقی

۔۔۔۔۔۔۔۔۔۔

دموں میں نخلِ سدرہ نظر آئے سجدہ ریز

وہ روشنی جو پہنچی سرِ لا مکاں تلک

سید ساغر مشہدی

۔۔۔۔۔۔۔۔۔۔

نخل_جنت کا قلم ہو، حوض_ کوثر ہو دوات

روشنی ہو روئے احمد کی تو لکھوں ایک نعت

بشیر قادری

۔۔۔۔۔۔۔۔۔۔

کس لیے میں نخلِ رحمتﷺ سے چھڑاوں زندگی

روشنی پاوں جہاں پر میں لٹاوں زندگی

محمد احمد زاہد

۔۔۔۔۔۔۔۔۔۔۔۔

جب مدینے کی راہ پر ہوں قدم

نخل در نخل روشنی پھوٹے

افرا سیاب کامل


اس کلام کا بہترین حاصل رفیع الدین راز اور ریاض احمد برکاتی کے حیران کن کلام تھے ۔ دونوں صاحبان نے مطلع و مقطع کے ساتھ ایسے مکمل کلام کہےکے ہر شعر میں روشنی اور نخل کا تلازمہ استعمال کیا ۔ آپ کی ذوق لطیف کی نذر۔


عکس ممکن ہی نہیں ہے احمدِ مختار کا

روشنی اوصاف ہے نخلِ بدن سرکار کا


ہو رہا ہے نخلِ جاں سے روشنی کا انعکاس

آ گیا دل کو سلیقہ نعت کے اظہار کا


یہ مرا نخلِ یقیں یہ برگ و بارِ روشنی

دین ہے اللہ کے محبوبِ خوش اطوار کا


نخلِ جاں پر روشنی برسا رہی ہے نعت آج

قامتِ جاں پرگماں ہونے لگا گلزار کا


ڈھل گئے تھے روشنی کے نخل میں ارض و سما

تھا یقینًا وقت وہ محبوب کے دیدار کا


نخلِ ذاتِ مصطفے کی روشنی معراجِ نور

آپ ہی کی ذات ہے معیار برگ و بار کا


منبع ہائے روشنی لکھے گا ہر نوکِ قلم

ذکر جب بھی آئے گا اس نخلِ سایہ دار کا


روشنی کے پیرہن میں ہے وہ نخلِ مشتِ خاک

دے رہا ہے درس جو انسانیت سے پیار کا


صورتِ خورشید یہ جو روشنی کا نخل ہے

راز پر تو ہے رسولِ پاک کے کردار کا

رفیع الدین راز


پھوٹتی ہے نخلِ رحمت سے نرالی روشنی

دیدہ ور کہتے ہیں وہ ہے بے مثالی روشنی


سایۂ. نخلِ کرم میں، با ادب پیشِ حضور

جھولیاں پھیلائے رہتی ہے سوالی روشنی


نخلِ سدریٰ ہے مقامِ انتہائے جبرئیل

اس سے آگے جا رہی ہے شان والی روشنی


نخلِ عشقِ مصطفائی اس لئے ہے پرضیا

اس پہ پڑتی ہے عتیقی ضو، بلالی روشنی


کی ہے جس کی آبیاری دستِ قدرت نے ریاض

کتنی ہے اس نخلِ نوری کی جمالی روشنی

ریاض احمد برکاتی


تلازمہ کاری 16 کا فیس بک ربط یہ ہے : " تلازمہ کاری 16 "

مزید دیکھیے[ترمیم | ماخذ میں ترمیم کریں]

اپنے ادارے کی نعتیہ سرگرمیاں، کتابوں کا تعارف اور دیگر خبریں بھیجنے کے لیے رابطہ کیجئے۔Email.png Phone.pngWhatsapp.jpg Facebook message.png

Youtube channel click.png

تلازمہ کاری 1 | تلازمہ کاری 2 | تلازمہ کاری 3 | تلازمہ کاری 4 | تلازمہ کاری 5 | تلازمہ کاری 6 | تلازمہ کاری 7 | تلازمہ کاری 8 | تلازمہ کاری 9 | تلازمہ کاری 10 | تلازمہ کاری 11 | تلازمہ کاری 12 | تلازمہ کاری 13 | تلازمہ کاری 14 | تلازمہ کاری 15 | تلازمہ کاری 16 | تلازمہ کاری 17 | تلازمہ کاری 18 | تلازمہ کاری 19

"نعت کائنات " پر اپنے تعارفی صفحے ، شاعری، کتابیں اور رسالے آن لائن کروانے کے لیے رابطہ کریں ۔ سہیل شہزاد : 03327866659
نئے صفحات