بانی اسلام اے خورشید تابان عرب منشی بشیشور پرشاد منور لکھنوی

شاعر : منشی بشیشور پرشاد منور لکھنوی

نعتِ رسولِ آخر صلی اللہ علیہ وآلہ وسلم

بانیءاسلام اے خورشید تابان عرب

اے محمد مصطفی جان عرب شان عرب

ظل اقدس میں پھلا پھولا گلستان عرب

جگمگایا نور وحدت سے بیابان عرب

آپ کے پیغام کی بنیاد تھی الہام پر

اک نئی دنیا بسا ڈالی خدا کے نام پر

اپنے مسلک کے محافظ اپنی امت کے کفیل

سینہءشفاف کی خاک مدینہ ہے دلیل

آپ نے کردی نجات روح کی پیدا سبیل

حشر میں اہل صفا کے آپ ہی ہونگے وکیل

لاکھ کعبے ضوفشاں تھے دیدہءپرنور میں

روشنی پیدا نہ تھی ایسی چراغ طور میں

آپ پر نازل خدائے پاک نے قرآں کیا

سرمہءتوحید سے وا دیدہءعرفاں کیا

آشکارا زندگی زندگی کا جوہر پنہاں کیا

پیکر اقدس کو رشک کعبہءایماں کیا

جو نہ سمجھیں آپ کا رتبہ وہ اہل دل نہیں

اور کوئی جادہءتسلیم کی منزل نہیں

وا نہ ہے چشم ظمیر اب تک نہ صاحب دل ہوں میں

دور ہے کوسوں جو بیداری سے وہ غافل ہوں میں

ناشاس راز پنہان حق و باطل ہوں میں

کیسے پھر اسلام کی تفہیم کے قابل ہوں میں

گو مسلماں میں نہیں پر قائل اسلام ہوں

کیونکہ مردان خدا کا بندہءبےدام ہوں

بانیءاسلام-خوں اسلام کا ہوتا ہے آج

خندہ زن حالت پہ دین پاک کے دنیا ہے آج

پھر دلوں میں گمرہی کی کیفیت پیدا ہے آج

رازداں اسلام کا اسلام میں عنقا ہے آج

بےخبر قرآن کےمعنی سے کچھ میں ہی نہیں

عظمت اسلام سے واقف مسلماں بھی نہیں

جانتے ہیں راز مردان خدا اسلام کا

ہیں سمجھتے مرتبہ اہل صفا اسلام کا

ہے فقط عشق الہی مدعا اسلام کا

اور کچھ مقصد نہین اس کے سوا اسلام کا

ہو بنا نفرت پہ جس کی یہ وہ مذہب ہی نہیں

دوسروں سے ترک الفت اس کا مطلب ہی نہیں

سرزنش کافر کی اور اسلام ناممکن ہے یہ

ہو دل آزاری سے اس کو کام ناممکن ہے یہ

دے کسی کو موت کا پیغام ناممکن ہے یہ

ہاتھ میں لے تیغ خوں آشام ناممکن ہے یہ

اور جو کرتے ہیں ایسا آڑ میں اسلام کی

دہجیاں اڑتی ہیں ان کے جامہءاحرام کی

مذہبی دیوانگی اسلام کا عنصر نہیں

عقل پر صیقل یہ کرتا ہے جنوں پرور نہیں

قلب کے جذبات حیوانی کا یہ مظہر نہیں

نفس کے افعال شیطانی کا یہ مصدر نہیں

اور جو قائل ہے اس کا وہ مسلماں ہی نہیں

بندہءاسلام ہوکیسے جو انساں ہی نہیں

کھیل کیوں سمجھا ہے اک اہل شریعت نے اسے

طاق پر رکھا ہے کیوں اہل عبادت نے اسے

کرلیا قبضے میں ارکان حکومت نے اسے

کردیا بدنام ارباب ریاست نے اسے

جس کا بانی آپ سا ہادی ہے یہ وہ دین ہے

اس کی پابندی نہ کرنا آپ کی توہین ہے

کیوں ہیں تاویلیں یہ الٹی آپ کے احکام کی

صبح نورانی میں کیوں شامل ہے ظلمت شام کی

پھر ہو عظمت آشکارا آپ کے پیغام کی

لیجیئے آکر خبر عالم اسلام کی

نام پر مذہب کے ظلم و جور کی بدعت نہ ہو

راہ سے بے راہ یعنی آپ کی امت نہ ہو

(مجموعہءکلام ۔ کائنات دل)

مزید دیکھیے

منشی بشیشور پرشاد منور لکھنوی | دلو رام کوثری | عرش ملیسانی | غیر مسلم شعراء کی نعت گوئی