آپ کا عہد گر ملا ہوتا ۔ نجیب احمد

شاعر : نجیب احمد

نعتِ رسولِ آخر صلی اللہ علیہ وآلہ وسلم

آپﷺ کا عہد گر ملا ہوتا ​

میں بھی ہم عصر کعبؓ کا ہوتا​

مجھ کو جینے کے ڈھنگ آ جاتے ​

میں بھی اک پیکرِ وفا ہوتا ​

زخم جو آپؐ کو احد میں لگا ​

میرے ماتھے پہ وہ کھِلا ہوتا ​

آپؐ جن راہوں سے گزرتے تھے ​

ان پہ میرا بدن بِچھا ہوتا​

میں اتر جاتا کفر کے دِل میں​

آپؐ کا تیر بن گیا ہوتا ​

کاش میں بھی لحد کی مٹی میں ​

آپؐ کے ہاتھ سے ملا ہوتا ​

ایک انسانﷺ دیکھتا میں نجیب ​

اور قرآن پڑھ لیا ہوتا ​